APRIL 2022
Pintu Penama Entara Sarawak Dibuka Bepelasarka SOP Baru
KUCHING: Taja pintu penama ba entara menua Sarawak diatu udah dibuka ngagai orang menua bukai tang bela disempulang enggau Atur Operasyen Standard (SOP) chara tama ke pemadu baru.
Sapit Premier Sarawak ke mega Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas madah, tiap iku peranak menua bukai ke deka tama ke Sarawak mesti nitihka SOP enggau atur ke udah ditetapka.
Iya mega madah, temuai nyengkaum peranak Sarawak empu di Singapura ke deka tama ngagai nengeri tu bela dipinta beperesa RT-PCR dulu dua hari sebedau.
“Baka ka seharitu, raban JPBNS enggau ejensi ke bekaul udah ngatur simulasyen beserimbai enggau pengawa muka pintu entara menua Sarawak, lalu penerebai bilun keterubah ari Singapura nuju ke Kuching iya nya kena Hari Enam lalu Hari Minggu di Miri,” ku iya.
Iya bejaku munyi nya maya ngabas Padang Bilun Entarabansa Kuching (LTAK) dikena nentuka atur tama ke Sarawak dipejalaika enggau mujur, kena Hari Lima tu tadi.
Nambahka jaku iya baru, Datuk Amar Douglas mega madah, JPBNS enggau ejensi ke bekaul udah nyikap diri napi penatai temuai ari Singapura.
“Aku mega udah berandau enggau Menteri Perengka Pengangkut Sarawak, Datuk Seri Lee Kim Shin madahka mengeri Miri diatu udah nyikap diri nerima penatai keterubah ari menua bukai kena Hari Enam,” ku iya nerang.
Atur tama ari Brunei agi baka sebedau tu nyentuk 15 April ila, lalu ari Indonesia Datuk Amar Douglas madahka iya deka berandau enggau Konsulat Indonesia kena Hari Satu tu.
“Naka ke diatu, kitai udah muka pintu adan entara menua di Tebedu, lalu kitai mesti nyikap diri lebuh maya deka muka pintu penama di Biawak, Brunei-Limbang sereta pintu penama entara menua ke bukai,” ku iya.
Berebak enggau nya, Datuk Amar Douglas Uggah ngarapka rayat Sarawak semampai meri kerejasama ngemeranka SOP ti udah ditetapka raban Kaunsil Pengelikun Menua (MKN). -EDISI UKAS
Sumber dari : UKAS